Passing Through Times
Passing Through Times
Skip to content
Home
About author
About this Page/Blog
Search for:
Posted on
August 3, 2025
by
Prasad Indraganti
లోకాలోకం
కావ్యాన్ని ముక్కలు చేసి
చిదిమేయకు
చలిమంటలో పడేయకు
ఏ వాక్యంలో
ఏ విస్పోటనం ఉందో!
తెల్లారిందని
దీపం ఆర్పేయకు
ఆకాశం నిండా
నల్ల నల్లని మబ్బులు
సూర్యుణ్ణి మింగేసిన చీకటి
మొదటి మెట్టు ఎక్కేనని
సంబరపడకు
ఇది నిచ్చెనల వ్యవస్థ
బంగారం పండిందని
బోర విరుచుకోకు
దళారీలకి
ధర ఎప్పుడు పడేయాలో
వెన్నతో పెట్టిన విద్య
మాటలతో ఉచ్చులు
బిగించే వాళ్లు
అంతా నీ కోసమే అని
రోజూ మిద్దెక్కి కూసే
దొంగ కోళ్ళు
రహస్యాలన్నీ
పంచేసుకోకు
తీపి వలల్లో
జారిపడకు
ముడి విప్పుకుని
తప్పుకునే
చిట్కా ఎప్పుడూ
మరచిపోకు
పద్యాన్ని వెలకట్టి అమ్మేయకు
ఎప్పటికైనా పనికొస్తుంది
తాటాకు చూరులో
తాళపత్రం మీద కవితలా
Post navigation
Previous Article
నిద్రా సమాధి స్థితిః
మరణాన్ని
మడత కుర్చీలో దాచి
కూర్చొని కాళ్ళు జాపుకొనే
వయసు నాది
ఉచ్ఛ్వాస నిశ్వాసాల
గాలి సయ్యాటలతో
వేణు గానానికి
తోడైన మృదంగవాద్యం
ఎప్పటికప్పుడు
ఒడిదుడుకులు
సర్దుబాటు చేసే
హృది ఢమరుకం
న్యూస్ పేపర్ వెనకాల
ముఖం దాచుకునే కాలం
ఎప్పుడో జారిపోయింది
ఇప్పుడు మెడ వంచుకుని
కనిపించినంత చూసుకునే
మొబైల్ ఫోనాట
ఉద్వేగమయి
భయ విహ్వలమయ్యే
ఏకాత్మత
దారికాస్తూ
ఎండపొడకోసం
నిల్చున్న
అస్తిమితం
సముద్రమొద్దు
నదీ సంగమమసలే వద్దు
ఉత్తరాయణం వేళ
చలి తగిలిన ఎండలో
ఆకులు రాలే మంచు పొడిలో
బ్రతుకుచెట్టు నన్ను విదిలిస్తుందా!
రావి చెట్టు నీడలోనో
గంగరావి చెట్టు మొదట్లోనో
మర్రి ఊడల జడల్లోనో
తిరిగే గాలి తరగలా
దోబూచులాడే వెలుగు జాడలా
మంద వెళ్ళిపోయేక
ఒక్కర్తయి నిలబడిపోయిన
మేక పిల్లలా
మాగన్నులో కల
కాలం కదుల్తోందా?
నిద్ర దీర్ఘనిద్రగా
మిగుల్తోందా?
Next Article
కవిత్వం అమృతమవ్వాలి
Leave a Reply
Cancel reply
You must be
logged in
to post a comment.